رئيس مجلس الإدارة : هاني نصر

مايسه رضا.. تكتب: (فضفضه) بطلوا استفزاز

كتب : دكتورة مايسه رضا
PM 10:45 2017 May 2 ,Tuesday
دكتورة مايسه رضا

قررت الاسبوع ده اني ارصد كام تصريح صدر من الساده نواب مجلس الشعب الموقر وخبر في جريده.. لفتوا نظري واستفزوني جدا … واكيد استفزوا ناس كتير

التصريح الاول : كان اقتراح من احد النواب الافاضل بوضع ايجار لصالح الحكومه او جبايه او رسوم او اي حاجه من اللي فاتوا كإيجار لصفحات الفيس بوك اللي هي بتاعتنا وباسمنا وصاحب الفيس حي يرزق ما عملهاش اصلا.

طبعا النائب المحترم لقي ان الشعب متابع الحكومه علي صفحات الفيس وطبعا عامل صداع للمقصرين فقرر يلقي بأبداعاته علي الحكومه لمساعدتها علي تأديب الشعب المزعج اللي هو احنا .

التصريح الثاني: النائب المحترم ((أ.أ)) اللي قال بالحرف الواحد التصريح البرنس اوي …(للقضاء علي الايادي المرتعشه لابد من اعفاء المسئولين من المحاسبه) .. النائب عاوز يريح المسئولين والحكومه من الشعب قليل الادب .. عاوز يعفي المسئولين ان حد يسالهم ليه اتصرفتوا كده .. لان المسئول طبعا ملاك مابيغلطش …يعني مواطن يموت .. فلوس من الدوله تختفي …مالناش صالح الشعب يخليه في حاله والمسئولين يعملوا اللي هما عاوزينه بالشكل اللي عاوزينه والشعب ياكل ويشرب ويخلف وبس واولنا طبعا صاحب التصريح.

التصريح التالت: لابد من فرض ٧ الاف جنيه علي كل عقد جواز …الراجل كتر خيره عاوز يلم فلوس للدوله من الشعب المبذر الفنجري اللي يقرر بكل بجاحه انه يتجوز ..واللي عاوزين يتجوز يدفع ضريبه عقد جواز …حضرته موش واخد باله ان فيه جوازات بتتفركش علي اجره المأذون …ولا فيه ناس بتتجوز وهي عليها اقساط تفضل تسدد فيها لغايه ولادهم ما يدخلوا المدرسه … وزي مايكون عاوز يقول هوانتوا كمان عاوزين تتجوزوا وتخلفوا من غير ماتدفع فلوس ياشعب يا نمرود ياللي تنشك في بطنك؟

التصريح الرابع: لابد ان تلزم الدوله كل طالب راسب بدفع ١٢ الف جنيه عن كل سنه رسوب ….وبصراحه اللي قال التصريح ده معرفش فكر فيه ليه وازاي ؟ …بدل ما يقول نعمل لجنه لدراسه احوال الطلبه المتعثرين قبل الفصل من الجامعات وضياع مستقبلهم ؟ ..طبعا ..الراجل بيفكر بوطنيه وقرر ازاي يلم فلوس الدوله المتبعتره علي ايد الطلبه الفاشله اللي بتسقط ..موش مشكله سقط علشان ظروف اجتماعيه ولا انسانيه وطبعا سيادته انسانيته موجهه لميزانيه البلد اللي ضايعه علي الطلبه اللي بتسقط

بصراحه مجموعه من التصريحات والاقتراحات للساده النواب لو دلت علي شئ انما تدل علي ان النواب اللي انتخبهم المواطن العادي علشان يحاسبوا لهم الحكومه ويكونوا صوته داخل المجلس الموقر … قرروا انهم يساعدوا الحكومه في محاسبه الشعب والتنكيل به.. يعني بدل ما النائب من دول يعمل استجواب لوزير ولا مسئول ليه عملت كده ؟… فين الفلوس والمشاريع الفلانيه؟ … قرروا انهم يتكاتفوا ويتضامنوا ويفكروا في ابداعات ازاي ينكلوا وينكدوا ويزهقوا الشعب اللي انتخبهم …يعني مره شعب انتخب ناس يحاسبولها الحكومه .. راحوا الناس اتفقوا مع الحكومه ومحاسبين الشعب .

والله لو دورتوا بحق الله هاتلاقوا الناس اللي بتبهدل فيهم دول هما اللي انتخبوك يا نائب المجلس وهما اكتر ناس خايفه علي بلدها … وسانداها … ناس عاوزه تعيش حياه طبيعيه جدا و تلاقي حكومه بلدها بتتصرف بهمه وبطريقه عاديه من غير النفخ والنفاق والتطبيل اللي بيحصل من ناس المفروض جايين يبقوا صوت للشعب موش سيخ محمي في صرصور ودن الشعب !!..كفايه علينا وعلي بلدنا ابداعات النواب وسيبوا الحكومه تشتغل في اطار من القانون والدستور .. والله العظيم عندنا قوانين ودستور اقوياء محتاحين بس ناس عندها ضمير علشان تنفذه ونواب مجلس شعب فاهمين دورهم يتابعوا التنفيذ والمحاسبه .. انما اللي فات دا كتير علينا نسمعه من ناس بتجر شكل الشعب وتستفزه.. وبمناسبه التصريحات الجميله دي افتكرت الحكمه اللي بتقول (عدو عاقل خير من صديق جاهل)

واخيرا.. مسك الختام

عنوان مستفز برضو في جريده كبري مصحوب بصوره بيقول: (صقر يستنجد بمحافظ كفر الشيخ لحمايته من قطيع من الغربان).. ايوة الصقر اللي بيطير دا ..وبيعور …لقي المحافظ ماشي و كانت الغربان بيتحرشوا بالصقر… راح الصقر نزل وقع في عرضه وقال للمحافظ احميني واستر عليا ربنا ما يفضحلك صقور.. بطلوا استفزاااز !


الأكثر مشاهدة

تابعنا علي فيس بوك