رئيس مجلس الإدارة : هاني نصر

مايسه رضا تكتب.. فضفضه: اكشفوا علينا نفسيا

كتب : دكتورة مايسه رضا
AM 12:17 2017 May 1 ,Monday
دكتورة مايسه رضا

اكشفوا علينا نفسيا

ليه كل مؤهلات الشغل في اي مجال هي الشهاده وساعات سنين الخبره هي الفيصل لشغل اي وظيفه ؟

طيب ايه الوضع لو الوظيفه دي فيها احكام ممكن تتعلق بمصاير اشخاص ومستقبلهم واللي هايقوم بالحكم او التقييم او التعامل اشخاص كلهم عقد ومشاكل.

ليه الشهاده والخبره هي اللي بتأكد بس ان الشخص ده مؤهل ؟!!

ما يمكن معقد.. ما يمكن مهزوز الشخصيه موش مؤهل لمركزه.. ما يمكن عنده مشاكل كتيره جواه وبيطلعها وهو بيمارس سلطاته.

الكشف النفسي علي كل من يتعامل مع اطفال سواء في دور ايتام او في كل المراحل الدراسيه مهم جدا .. وافتكروا حضراتكوا التجاوزات اللي اتنقلت عن طريق التصوير بالموبايل في حق اطفال منتهك حقوقهم من مجموعه من المرضي النفسيين.. بحجه انهم بيعلموهم وبيمارسوا شغلهم

لو دكتور جامعه…

لازم يكون مؤهل نفسيا وقادر علي الثبات الانفعالي لمواجهه بعض التجاوزات من تلاميذه ويعرف الفرق بين التقويم والتاديب والانتقام

وعنده منهجيه في التقويم ومعايير واضحه بيتحرك عليها

لازم يكون حيادي للحكم علي الدارسين وقيادتهم واستيعاب اختلافهم واعطاء حقوقهم بمنتهي الحياديه.. غير كده.. يبقي غير مؤهل نفسيا.

كله بياخد شهادات.. بس موش كله مؤهل نفسيا.

نيجي لضباط الشرطة

لما بنقابل ضابط بيتعامل مع الناس باحترام وتهذب وكمان بيؤدي واحبه بمنتهي الشفافيه.. ويحقق كل المطلوب منه.. بنكون مستغربين وبنقعد نحكي عليه كظاهره نادره الحدوث لان للاسف بقي هو ده الاستثناء والقاعده العامه للاسف بقت عكس الشخصيه دي.

للاسف الوحش خد في سكته الحلو بسبب اشخاص غير اسوياء ظلموا المحترمين في مهنتهم وافقدوا الناس الثقه في الباقيين.. هنا الكشف النفسي ضروره ملحه يخلصونا من المتسلطين والانتهازيين والساديين.. لان كله بياخد شهادات.. بس موش كله مؤهل نفسيا.

الساده القضاة

مهنه حساسه جدا جدا.. محتاجه شخصيات تحقق عداله رب العزه في الارض.. محتاجه اشخاص علي درجه عاليه جدا جدا من العفه والطهاره و الثبات.. لن تتحقق الا بكشف دوري نفسي مع السيرة الحسنة الطيبة.

اي مهنه اخري.. الخطأ فيها محدود.. الا المهن السابقه.. الخطأ فيها نتيجته كائنات مشوهه بتتحرك بيننا وبتنشر الفساد في منظومه مجتمعيه متكامله وبتنشر الاحباط بيننا.

مدرسين كل المراحل والجامعة وضباط الشرطه والقضاه اكتر مهن لازم يتسم اهلها بالاتزان النفسي وعدم التسلط واكيد السيرة الحسنة.. التلات مهن بيقوموا اجيال و بيخدموا شعب وبيحققوا عدل.. ولو اتزن اصحابها اتزن المجتمع اللي جاي واللي حاضر.

التلات مهن تحديدا.. في ايدهم يطبقوا قوانين.. ووقت اللزوم يطبقوا روح القانون في الحالات الانسانية.. الحالات دي بتكون محتاجه انسان متزن متحمل للمسئوليه يقدر يفصل بين الحالتين بمنتهي الفصل والاتزان ودون محسوبية.

الكشف النفسي مايقلش أهميه عن الشهادات وسنين الخبره واجراؤه بشكل منتظم لازم يفعل ويكتب علي اساسه توصيات من اساتذه متخصصين.

لو بقي فيه كشف نفسي علي المدرس ودكتور الجامعة والضابط والقاضي.. هاننتقي اشخاص متميزه كفيلة باحتواء مهنتها مهمتها تقويم اجيال وافراد ومجتمعات.. هانلاقي افراد تحمي المهن دي من ظلم المتجاوزين اللي بيسيئوا لها لغايه مافقدنا الثقه في كل حاجه حوالينا.

هانلاقي الشخص المناسب في المكان المناسب.. بعد ما بقي الكويس فيهم استثناء والمفروض انه القاعدة.. الكشف النفسي موش اهانه للمهن دي.. دا حفاظ عليها من تجاوز المرضي ضد الاسوياء منهم وبيتسببوا في تشويههم.. الكشف النفسي ضروره.. ارحمونا من سلطات بيطبقها احيانا ناس محتاجين التقويم والتأهيل قبل مايحكموا علي الناس ويحددوا مصايرهم.. اكشفوا علينا نفسيا.


الأكثر مشاهدة

تابعنا علي فيس بوك